..كوكب تاني.. بقلم الشاعر الأسطورة/ طارق السيد

كوكب تاني (من محض الخيال هههههههه )
مراتي يكتر خيرها
تسلم طراطيف مناخيرها
لما بتحشرها في حاجة
تفرك وتجيب في أخرها
ولما تقوم م النوم
بوزها يمد لشبرين
ويبدأ هذا اليوم
بصوت مقسوم نصين
نص مسرسع أوبرالي
والنص التاني حياني
معرفش أنا إيه بيجرالي
غير صوت محشور في وداني
وتخش وتاخد دش
تطلع زي ما بتخش
تدهن شعرها فازلين
قال يعني البت فريش
ياسلام لما بتتكلم
بتفتف ياسلام سلم
على طول يركبني العصبي
وأرفع في حواجبي وأبلم
والناس بتقوللي يانيلة
إخترت الخفة الحيلة
هد ياشمشون المعبد
على راس الست دليلة
أرد وأقول هيهات
شمشونكو أبو العضلات
لو شاف الست بتاعتي
على طول يعمل جمالات
دي مراتي من كوكب تاني
كوكبها ياناس عدواني
بين المريخ والزهرة
جوة الشق الجواني
بقلم طارق السيد