₩ماليش زي ولا مثيل ₩ بقلم الشاعرة/ صفاء الخواجة

₩ماليش زي ولا مثيل ₩
م أقبلشي يكون لي شريك
يقاسمني مشاعر فيك
مش ح أقبل يبقي لي ف قلبك
يا حبيبي عزول يحاكيك
**   **    **   **
لو ناوي تحب ..وتهواني
خلص حواديتك و كلامك
مع كل حبايبك و جيرانك
و أفضي لي بقلبك و حنانك
**   **    **    **
أنا أصلي يا روحي بأغير
و ما احبش رغي كتير
ولا أحب تسبل و تلاغي
عصفورة من العصافير
**    **    **    **
دي شروطي و طبعي و إحساسي
لو عايز قلبي ...و دقاتي
نفذ لكلامي و طلباتي
و إثبت لي الحب دليل
**    **    **    **
يا تفارق وتسيبني ف حالي
غيرك راح يقبل بغرامي
وبكل دلالي و أوضاعي
ولا يرضي يشوف لي بديل
**    **    **    **
لو جيتني ح تعرف و تقارن
بيني وبين سابق أيامك
و تحس حناني و أشواقي
مالهاش ولا زي ولا مثيل
      **    **
((كلماتي/ صفاء الخواجة ))